■唐先生稱遭警員用警棍敲打右腳，令他行路「拐吓拐吓」。
■有示威者被警員按在地上制服。法新社
■警員前晚凌晨將示威者驅離龍和道，有女示威者乘亂撤離。美聯社
■戴上頭盔的警員一手搶鐵馬，一手以警棍毆打示威者。
龍和道清場當晚，港人在鏡頭下，目睹曾健超被七名魔警毆打。那一夜，警察瘋狂鎮壓，「魔警」豈止七人。被捕的45名示威者，部份也慘遭毆打，有社工只在添馬公園扶起被警推跌的市民，差人即拉他到暗角拳打腳踢，雙膝嚴重受傷；只得20歲的小伙子在隧道出口，被差人狂踩、用警棍打傷頭、手、背脊。幾名受傷市民，重組當晚的魔警暴力龍和道。
記者：譚靜雯 陳凱迎
社工扶人被拖到暗角狂毆
社工唐先生
案發地點：添馬公園
他的「武器」：頭盔
「四、五個警員扯開我個頭盔、拳打腳踢，打咗大約4分鐘，之後再有一個着警察背心用警棍向我隻腳係咁打！一邊打一邊話『留喺度吖嗱！唔行開吖嗱！駁嘴！」唐先生昨凌晨約12時半才獲釋，離開北角警署時，疑被魔警毆打至行路「拐吓拐吓」，雙膝嚴重受傷貼上紗布，背部、手臂、雙腳都有被警棍毆打的烙印。
唐先生當晚只是留守在添馬公園，扶起被警員推跌的示威者，手上沒警方所謂的雨傘及保鮮紙等「武器」，只有一個保護自己的頭盔。面對手持盾牌、警棍的警員：「警員一路向我哋叫囂、之後一路推、一路推，前排啲人舉起雙手，一路向後退，當時好多人跌喺地，我只係扶起跌低嘅人，但就俾警員撞跌。」
這一跌，也是他噩夢開始，「我跌低跪喺地，一開始（警員）扯住我兩隻手臂、膝頭就喺地下拖，之後有五個人抬起我，一路都有兩至三個警員喺旁邊用腳踢我，踢我腳、背脊同手臂」。
他之後更被四至五名警員拖到暗角毆打，「4、5個警員扯開我個頭盔、拳打腳踢，維持4分鐘，之後再有一個着警員背心的人用警棍打我隻腳」。短短的四、五分鐘，即使被拘留逾20小時後，仍歷歷在目。
「警察最黑暗面都出嚟」
被拘留期間，警員不時呼喝、態度極不友善。約3時半至6時半間，他多次要求醫療協助不果，「我想睇清楚嗰份arrest paper，只係問一啲字眼，就有警員呼喝，又大聲講『請你合作少少，如果你唔合作有排你搞！』」
唐先生曾在7.2預演佔中被捕，他直斥警方前晚清場時猶如「黑社會、爛仔」，「警方當晚所謂清場，好明顯使用過度武力，無必要不停去推、又不停叫罵，呢件事極度荒謬。今次警察嘅最黑暗面都出嚟，用好暴力嘅方式對待，上次（7.2）技巧性抬走你，今次係抬你去打。嘩！爛仔、黑社會！上次係穴位按壓法制服示威者，今次係捉你去打！」
自佔領行動開始，他一直留守金鐘，魔警的拳打腳踢絕不會令他退縮，「唔會影響我爭取公民提民、真普選嘅決心，只會越打壓越堅定」。
沒衝擊遭警棍兜頭扑
歐先生
案發地點：龍和道隧道出口
他的「武器」：雨傘、口罩 「生不入官門」，歐先生人生首次入警署，就被魔警用警靴狂踩、被警棍打頭、手臂及背脊，「好多警察衝過嚟，乜嘢都唔講就拉我落地，出警棍、腳狂踢我條頸，背脊同頭」。被拘留20多個小時，他眼角、背脊及頸背等傷痕纍纍，未獲安排驗傷，就再次重返雨傘廣場。
一直在金鐘留守的歐先生前晚到龍和道聲援，突然幾百名警員清場，他與其他示威者退到隧道出口。手持雨傘、戴上口罩戒備，以防警員出動胡椒噴霧。
「阿Sir突然衝過嚟，一見人就拉落地，我被阿Sir推低後，俾好多人一齊用腳、警棍狂踩、狂踢我背脊、頸、頭同手，又用拳頭打我，約幾十秒，我一直冇反抗，上咗手銬後，佢哋扯我口罩、一次又一次扯我條頸鏈，扯斷咗。」
歐先生向記者展示的傷口多達六、七處，當中最嚴重是頸背位置。他坦言今次很多被補者只是在附近了解，並無衝擊。「無論你只係企喺旁邊，手上乜嘢都冇，都會俾警察拉落嚟，之後幾個一齊按落地下」。拘留期間，他遭警員不人道對待，「去廁所都要等半個鐘，又問我係咪收咗2,000蚊？阿sir仲話，知道藍絲帶同黃絲帶都有收錢」。
阿Sir搶傘拉人落石壆
陳先生
案發地點：龍和道隧道石壆
他的「武器」：雨傘
陳先生是「暴力龍和道」的第一名被捕者。清場當晚，大批配備防暴裝備的警員一字排開殺入隧道，陳先生當時只是手持雨傘，站在石壆上，「我只係拎住一把遮，冇口罩、眼罩，只係視察情況，突然有位阿Sir搶走我把遮，我就失平衡，之後起碼四、五個警察衝過嚟，成個人就被拉落地，再拉我入警察堆裏面，俾人拳打腳踢」。他就成為龍和道清場當晚首名被捕者。
北角警署門外，前晚不少人等候自己的親人、朋友被釋放。站在最前的是陳先生的媽媽。她一個月前辭去工作，準備佔領中環，「如果仲唔出嚟，香港就冇希望！」她與兒子當晚都在龍和道，「我個仔八卦去睇睇，都冇衝突，突然就被拘捕」。最終她在北角警署找到兒子。
等了又等，兒子終獲釋，她也放下心頭大石，「我一路等，我覺得佢會知道我喺度支持佢」。陳先生坦言，當晚被拘捕時，曾遭警員拳打腳踢，之後曾到黃竹坑警校，再到北角警署，足足被拘留超過20小時。他又稱，不少被捕者都無參與龍和道佔領事件，「好多人被拉落嚟都嚟唔切有反應，喺草叢無啦啦就俾警察扯落嚟，唔知點解被拉，冇任何警告下就被拘捕」。
送包男搵鞋被壓地上
IT人Leo
案發地點：龍和道馬路
他的「武器」：眼罩
Leo在示威人士衝出龍和道馬路時仍在家中，「見佢哋佔咗龍和道，就想買幾箱麵包，揸車拎過去」。
Leo抱着麵包，先走到龍和道附近的物資帳篷，義工建議Leo把麵包放在添馬公園草地那邊更好。
當Leo由草地折返龍和道時，突然聽到有人說警方開始清場，除了本身預備好的眼罩，現場亦獲發保鮮紙、口罩和一把縮骨遮，不久後警員已從兩邊擁過來，「警察當時目標明顯不是清路障，而係為咗拉人」。
混亂間，Leo其中一隻鞋被「踩甩」，就在他俯身想找回鞋子之際，突然被一名警員從後撲上，把他壓在地上，其右腳膝蓋擦傷，被警員強行扯走眼罩；他其後被帶上警車，輾轉送到黃竹坑警校，並被安排與10多人留在一個房間內。
Leo從同房的被捕人士得知，不少人原來在清場那一刻根本無衝擊警方防線，「其實大家都係花生友，有人咁啱喺嗰個位置，或者當時舉機影緊相」，當中更有人如Leo般，混亂間跌了眼鏡或袋，俯身尋找時被警員從後壓倒在地，結果有人「撞爆嘴」，更有女生被男警壓下，其後才交給女警。
天網提示:
中共對號入座的邪教鑑別法。
來源轉自：
（注意：帖內文或圖片中可能含有厭惡性簡體字；本站維護中華文化，堅決行使正體字。版權歸著者所有。）
沒有留言:
張貼留言